ДФР кашмарыць транспартнікаў: у вялікіх лагістычных аператараў вобшукі і арышты

Як вядома «Нашай Ніве», толькі за апошнія два тыдні арышты і вобшукі пракаціліся па офісах буйнейшых лагістычных кампаній Беларусі: «ПраЛіў», «Тэлс Глобал», «ВестТрансЛайн», «Інтэртрансаўта» і іншыя.

Супрацоўнікаў масава не затрымліваюць, але бенефіцыянтаў і дырэктараў — так. Візіты органаў праходзяць у звычайным стылі запалохвання: з выбітымі дзвярыма і маскі-шоу.

Кампаніям інкрымінуецца сыход ад падаткаў — ч. 3 арт. 243 Крымінальнага кодэкса — ад 5 да 12 гадоў калоніі.

Кіраўнікам кампаній налічваецца штраф сыходзячы з памеру недаплачанага — па меркаванні органаў — у бюджэт.

Як вядома, першай кампаніяй, да якой узніклі пытанні стала «ДжэнціСпедзішн». Нібыта яе супрацоўнікі, фактычна знаходзячыся ў Беларусі, працавалі ў інтарэсах яе прадстаўніцтваў у іншых краінах. Перадусім — Расіі і Казахстана.

Па меркаванні органаў, калі камерцыйная дзейнасць ажыццяўляецца ў Беларусі, а аплаты за яе прыходзяць на рахункі ў іншых юрысдыкцыях, гэта падстава і для далічэння падаткаў, і для крымінальнай справы.

Кіраўнікі «ДжэнціСпедзішн» прызналі віну і выплацілі дзясяткі мільёнаў штрафу, пасля чаго ДФР пайшоў па іншых лагістычных кампаніях, мяркуючы, што па такіх жа схемах працуюць і іншыя.